西西弗斯之歌

呢年嚟我有幾份兼職　其中嘅一份

係幫啲馬迷落注　喺電話投注中心

喺裡面我識唔到朋友　返工食飯都係一個人

我已經悶到抽筋　但要維生

我諗到一個方法抗衡

開閘前半分鐘　總有好急嘅客人

落注嘅時侯夾雜粗口　聽到我一嚿雲

但佢哋愈係忟　我就愈係斯文

我話：「麻煩你重複一次」

搞到夠鐘開閘　佢哋就問候我屋企人

佢鬧我正一懵撚　話要叫個經理出嚟問

我都好有禮貌咁回應：「先生，麻煩你等等」

我既緊張又興奮　同時又扮晒殷勤

喺呢個心情咁複雜嘅搏鬥裡面

我開始搵到工作嘅快感

希臘神話有一個故事

講述西西弗斯受到諸神嘅懲罰

要喺地獄不斷推一塊巨石上山

上到山頂　塊巨石又會自己碌返落山腳

佢每日都要重複呢種徒勞無功嘅工作

直到永恆

後人有一個講法

話諸神並唔係用「推石頭」嚟懲罰西西弗斯

而係用觀念

用「我永世都要推石頭實在太慘」嘅呢個觀念

西西弗斯知道自己改變唔到命運

佢唯一可以做嘅　就係繼續推石頭

直到有一日

佢發現佢可以蔑視自己嘅命運

甚至用享受呢個過程嚟去否定諸神對佢嘅懲罰

於是　佢感覺到自己係快樂嘅